Shkodër, 10 prill, NOA -Â Plagosen dy efektivë policie në krye të detyrës përgjatë një operacioni për kapjen e disa të dyshuarve për kriminalitet, informon korrespondenti i agjencisë së lajmeve NOA.
Ngjarja ka ndodhur në qytetin e Shkodrës, ku dy punonjësit e policisë, kanë mbetur të plagosur lehtë gjatë një operacioni për arrestimin e tre personave të dyshuar për trafik lëndësh narkotike.
Burime zyrtare nga policia e Shkodrës, konfirmuan se dy efektivët e policisë u plagosën gjatë operacionit për arrestimin e Sabah, Mondi e Besnik Vuçaj.
Këta tre vallezër dyshoheshin për trafik të lëndëve narkotike, dhe për arrestimin e tyre policia kishte ngritur një prite sekrete në aksin Vuçaj-Bratosh.
Por, gjatë operacionit, pas përballjes me tre të kërkuarit, këta të fundit kanë refuzuar thirrjen e policisë për vetëdorëzim dhe hapën zjarr ndaj efektivëve.
Megjithë kundërshtimin, efektivët e policisë përfunduan me sukses operacionin duke vënë në pranga tre personat e kërkuar.
Gjatë operacionit u sekuestruan në cilësinë e provës materiale, tre armë zjarri, dhe rreth 8 kilogramë, lëndë narkotike kanabis sativa.
Ndërkohë, policia sqaroi se një grup i posaçëm hetimor i cili po bashkëpunon me Prokurorinë e Rrethit, po kryen veprimet procedurale për zbardhjen e plotë dhe dokumentimin e ngjarjes
r.d/s.v/NOA
