Në të vërtetë, në mitingjet që realizonte Partia Socialiste gjatë fushatës së kaluar elektorale për zgjedhjet parlamentare, rëndom mblidhte nxënës nga shkollat, në ditë shkolle dhe në mjediset e shkollave, duke zhvilluar "lumë" mitingjesh që sot po i kritikon fort
Tiranë, 11 Prill NOA - Partia Socialiste akuzoi sot kryeministrin se "për më tepër, në një ditë pushimi nxjerr nxënësit në mitingje elektorale".
Reagimi erdhi nga kryetarja e Komisionit të Edukimit në Asamblenë Kombëtare të PS, Ledi Shamku.
"Abuzimi me fëmijët dhe mësuesit për qëllime elektorale po kalon çdo cak e masë. Sot në shkollat e Korçës është bërë mësim për t'i marrë nxënësit direkt nga klasa, e për t'i çuar në mitingun e Sali Berishës, që pasi ka prerë për të tretën a të katërtën herë shirita rrugës akoma të pambaruara, ka folur para një turme nxënësish e mësuesish të dhunuar në lirinë e tyre politike e në të drejtën e tyre të ditës së pushimit", - nënvizoi Shamku.
Ajo nuk harroi të premtojë, se më 28 Qershor "do të marrë fund kthimi i mësuesve e nxënësve në kope elektorale dhe do të nisë epoka e re e rilindjes se Arsimit të çliruar nga zinxhirët e interesave politike".
Në të vërtetë, në mitingjet që realizonte Partia Socialiste gjatë fushatës së kaluar elektorale për zgjedhjet parlamentare, rëndom mblidhte nxënës nga shkollat, në ditë shkolle dhe në mjediset e shkollave, duke zhvilluar "lumë" mitingjesh që sot po i kritikon fort.
e.l/NOA
