Tiranë, 12 Prill NOA - Partia Demokratike reagoi sot pasdite për disa deklarime që Edi Rama bëri dje në Kukës, për përfundimin e rrugës që tha se do bëhet nga PS, pasi të nxjerrë Berishën në pension.
"Edi Rama dje, mendoi se kishte përpara tij hunj të kuq, kujtonte se i fliste jo qytetarëve të Kukësit por hunjve të kuq kur u deklaroi se ai dhe Partia e tij nuk kishin qenë kundër rrugës", - tha Erla Mëhilli, zëdhënëse e PD.
"Atëherë të gjithë shqiptarët le t'i shtrojnë një pyetje z.Rama, vijoi Mëhilli: Përse në 8 vjet me radhë Partia jote jo vetëm që nuk e filloi rrugën por bëri asnjë kilometër të saj?"
Këtu PD shtron edhe pyetjen se ku shkuan z.Rama 200 milionë Dollarë taksë në vit që u vendos nga qeveria e majtë në kohën kur kreu aktual i Bashkisë së Tiranës ishte ministër i Kulturës dhe asnjë qindarkë e saj nuk u përdor për këtë qëllim? Mëhilli më tej iu drejtua Ramës me pyetjen: "Përse ke frikë të vizitosh rrugën që së shpejti përfundon? Përse të tmerron korridori i Shqiptarëve?"
PD ka atakuar edhe botuesin e "Shekullit", kur tha: "Së fundi Rama i deklaroi qytetarëve të Kukësit se rrugën do ta përfundojë me Koçot e tij. U zotua se do të zëvendësonte Bechtelin me Koço Kokëdhimën në mënyrë që rruga të vinte në standardet e Ramës". Në këtë pikë, Mëhilli iu drejtua Ramës: "Armik i rrugës, nuk mund të flasësh për flamurin kombëtar, mund të flasësh për çelësat që i dhuron Bregoviçëve të tu por jo për flamur kombëtar".
e.l/NOA
