Athinë, 13 prill, NOA - Ndërsa Greqia ka shprehur shpresën se presidenti i porsazgjedhur maqedonas do të punojë për zgjidhjen e çështjes së emrit, kryeministri grek ka theksuar se pasaporta e Maqedonisë për anëtarësimin në strukturat euro-atlantike, do të jetë një emër i përbërë, me referencë gjeografike, i cili do të përdoret kundrejt të gjithëve dhe jo vetën në marrëdhëniet me Greqinë.
Kryeministri grek, Kostas Karamanlis këtë deklaratë e ka bërë në fundjavë gjatë një takimi me elektoratin në rajonin që njihet si "Maqedoni greke". "Rruga për integrimin euro-atlantik e Maqedonisë, kalon detyrimisht nga marrëdhëniet e fqinjësisë së mirë me gjithë pjesëtarët e familjes ku aspirojnë të integrohen.
Kusht kryesor në këtë rrugë është arritja e një zgjidhjeje reciprokisht të pranueshme në çështjen e emrit të vendit fqinj. Pasaporta e tyre për strukturat euro-atlantike kërkon një emër të përbërë, me referencë gjeografike dhe që të vlejë kundrejt të gjithëve. Dhe përgjegjësia për këtë pasaportë i përket Shkupit", tha kryeministri grek.
"Është momenti i zgjedhjes, larg fanatizmave, nacionalizmave dhe urrejtjes nacionale," theksoi ai. Pala greke ka vlerësuar veçanërisht edhe deklaratën e sekretares amerikane të shtetit Hillari Klinton se ajo e sheh si krejt të arsyeshme gjetjen e zgjidhjes mbi bazën e një emri të përbërë, dhe se të dy palët duhen inkurajuar në atë krah.
n.e/NOA
