Përmet, 15 prill, NOA - U kishte premtuar se do t'i çonte të sigurt drejt Greqisë dhe për këtë gjë i kishte marrë secilit nga 700 euro.
Më pas, Llambro Braho i ka hipur tre personat në fjalë në autobusin e linjës Përmet-Çarshovë, i cili do i çonte në pikën kufitare të 3 urave, nga ku pretendonte të realizonte edhe kalimin e paligjshëm të tyre drejt tokës greke.
Por është kapur menjëherë nga forcat e policisë së Përmetit, duke bërë që të dështonte plani për këtë trafik klandestinësh.
Lajmi bëhet i ditur për agjencinë e Lajmeve NOA nga burime të policisë së Gjirokastrës, të cilat sqarojnë se Llambro Braho, ka moshën 33-vjeç dhe figuron si banues në qytetin e Durrësit.
Sipas të dhënave policore të komisariatit të Përmetit, në afërsi të kthesës së Bënjës në aksin rrugor Përmet-Çarshovë, në autobusin e kësaj linje, braho u kap së bashku me tre persona të tjerë, të cilët nga veprimet hetimore rezultuan se ishin nisur për të kaluar kufirin e gjelbër në mënyrë të paligjshme kundrejt pegesës nga 700 euro për secilin.
Materialet i kaluan Prokurorisë së Gjirokastrës për veprime të mëtejshme, mbi veprën penale të "Dhënies ndihmë për kalim të paligjshëm të kufirit kundrejt fitimit", parashikuar nga neni 298 i Kodit Penal.
n.e/NOA
