Tiranë, 15 prill NOA - Qeveria miratoi sot projektligjin për sistemin e taksave vendore, që vendos kufizimin deri në 10 për qind të taksës të biznesit të vogël.
Kryeministri Sali Berisha, në mbledhjen e sotme të qeverisë, e ka konsideruar biznesin e vogël sektorin më të fuqishëm të ekonomisë, ku janë punësuar rreth 200 mijë vetë, ndaj tha se kjo masë synon shmangien e abuzimeve ndaj kësaj biznesi.
"Biznesi i vogël është për Shqipërinë sektori më i fuqishëm i ekonomisë. Pavarësisht se kontributi i tij në buxhetin publik është pakrahasimisht më i vogël se biznesi i madh, biznesi i vogël është gjeneratori i punësimi në vend. Në këtë biznes janë të punësuar minimalisht 180-200 mijë shqiptarë. Taksa e biznesit të vogël u transferua tërësisht, në përputhje me konceptin e decentralizimit, në bashki e komuna. Sot, ky biznes është vendosur në vështirësi, në disa qytete të vendit", - u shpreh Kryeministri.
Ai ka bërë të qartë se "duke respektuar problematikën e pushtetit vendor, ne ngushtojmë marzhin, duke mos pasur të drejtë të vendosë më shumë se 10 për qind të taksës të biznesit të vogël."
Sakaq Berisha njoftoi gjithashtu një tjetër masë në mbështetje dhe mbrojtje të biznesi të vogël.
"Organi tatimor qendror, - u shpreh Kryeministri - me një Task Force të veçantë, të shqyrtojë me përparësi çdo ankesë të biznesit të vogël. Qeveria do të ketë tolerancë zero ndaj abuzimit me të. Ashtu siç po bën këtë ligj, qeveria mund të bëjë edhe ligje të tjera për ta mbrojtur atë."
Duke garantuar pushtetin vendor se qeveria është e gatshme t'i ndihmojë, në përputhje me nevojat që kanë, Kryeministri tha se nuk mund të pranohet që bashkitë të rrisin çdo vit taksën e pastrimit apo gjelbërimit.
"Atëherë, - u shpreh Berisha, - është e drejtë të pyesim se kur ka qenë normale dhe kur abuzive, cili nivel është normal dhe cili abuziv, apo në qoftë se pas tre viteve janë katërfishuar, lind pyetja çfarë ndodhi që ato të katërfishohen."
Kryeministri konsideroi se një tjetër masë në mbështetje dhe mbrojtje të biznesit të vogël do të jetë edhe rritja e pagave dhe pensioneve më 1 maj. Â
"Ky vit, në të cilin biznesi i vogël ndjen më shumë pasojat e krizës botërore, i ndjen ato, së pari me uljen e konsumit për shkak të kësaj krize. Ndaj rritja e pagave dhe pensioneve më 1 maj është mbrojtja më e mirë që i bëhet biznesit të vogël, sepse është një rritje shumë e ndjeshme e fuqisë blerëse e, së paku, 800 mijë familjeve shqiptare".
Për Berishën, duke sulmuar këtë akt, veçse dëshmohet se alternativë e vetme është mjerimi dhe varfëria.
"Në qoftë se rrisim pagat dhe pensionet, në raport me tregun, përfituesi numër një, pas atyre që përfitojnë këtë rritje page e pensioni, është biznesi i vogël. Kjo do të thotë më shumë shitje për të dhe kjo është jeta e tij," u shpreh Kryeministri.
Sakaq, Berisha siguron biznesmenët e vegjël se qeveria do të monitorojë me vëmendje të madhe gjendjen e tyre për t'i dhënë përgjigjen e merituar imediate çdo abuzimi mbi ta.
e.l/NOA
Â
