Prishtinë, 17 prill NOA - Kryeministri i Republikës së Kosovës, Hashim Thaçi i ka dërguar një letër, përfaqësuesit civil ndërkombëtar në Kosovë, Pieter Feith, ku sqaron se vizita e Tadicit duhet konsideruar si private.
Më poshtë, vijon letra e plotë e kryeministrit Hashim Thaçi dërguar përfaqësuesit civil ndërkombëtar në Kosovë, Pieter Feith, me rastin e vizitës së presidentit serb Boris Tadiç në Manastirin e Deçanit.
z. Pieter Feith Përfaqësues Civil Ndërkombëtar Përfaqësues Special i Bashkimit Evropian Prishtinë, Republika e Kosovës
I nderuar z. Feith, Duke iu referuar letrës suaj të datës 15 Prill 2009 rreth kërkesës për të mundësuar vizitën e Presidentit të Serbisë, z. Boris Tadiç në Kosovë më 17 Prill 2009 për të vizituar Manastirin e Deçanit me rastin e Pashkëve Ortodokse, dua të ju informoj se:
Duke konsideruar faktin se ushtrimi i lirive fetare është i garantuar me të gjitha konventat ndërkombëtare dhe duke pasur parasysh se Qeveria e Kosovës e konsideron këtë vizitë krejtësisht private dhe të natyrës fetare, në konsultim të plotë me krerët e institucioneve të Republikës së Kosovës, kam vendosur që të lejoj hyrjen në territorin e Republikës së Kosovës të Presidentit të Serbisë, z. Boris Tadiç më 17 Prill 2009.
Siç u deklarua më lartë, kjo vizitë është private dhe për arsye fetare dhe e njëjta nuk mund të përdoret për asnjë qëllim tjetër.
Presidenti i Serbisë do të përcillet nga Policia e Kosovës në Manastirin e Deçanit për të marrë pjesë në meshën me rastin e Pashkëve Ortodoksë dhe menjëherë do të udhëtojë prapa për në Serbi.
Nëse Presidenti i Serbisë bën çfarëdo deklarimi politik që është në kundërshtim me Kushtetutën e Republikës së Kosovës, në pajtim me nenin 4 (1) të procedurave dhe kritereve për vizita zyrtare të zyrtarëve të Qeverisë së Serbisë në Republikën e Kosovës, atij do t'i ndalohet hyrja në Kosovë në të ardhmen, qoftë në kapacitet privat apo zyrtar", - përfundo letra e z.Thaçi, Kryeministër i Republikës së Kosovës.
a.b/NOA
