Prishtinë, 18 Prill NOA - Ambasada e Shteteve të Bashkuara të Amerikës në Prishtinë e ka përshëndetur sot zyrtarisht vendimin e Qeverisë së Kosovës që t'i japë leje Kryetarit të Serbisë, Boris Tadiç, që të lutet në Manastirin e Deçanit me rastin e së Premtes së Mirë ortodokse serbe.
"Ne përshëndesim vendimin e Qeverisë së Kosovës që t'i japë leje Kryetarit të Serbisë, Boris Tadiqit, që të lutet në Manastirin e Deçanit me rastin e së Premtes së Mirë ortodokse serbe", - thuhet në deklaratën e posaçme që publikoi sot, ambasada amerikane, institucioni ndërkombëtar më me ndikim në Republikën e Kosovës.
Nëpërmjet deklaratës për shtyp, ambasada amerikane ka vlerësuar se vendimi i qeverisë ishte i drejtë.
"Ishte një vendim i drejtë. Ky ishte vendim i një shteti sovran, i marrë në frymën e Planit të Ahtisarit, dhe në interes të marrëdhënieve fqinjësore", - thuhet në deklaratën e ambasadës. Presidenti serb, Boris Tadiç, qëndroi dje në manastirin e Deçanit me lejen e kryeministrit Hashim Thaçi ku ndonëse nuk i lejohej të bënte deklarata politike, e lëshoi një të tillë: "Paqe për serbët, shqiptarët, për të gjithë ata që jetojnë në Kosovë, në Serbinë tonë", ka pretenduar Tadiçi pas përfundimit të ceremonisë në manastir me rastin e kremtes se Pashkëve ortodokse duke e përfshirë Kosovën në Republikën e Serbisë, mbetja e ish-Jugosllavisë që ende pretendon të përfitojë nga toka e shqiptarëve.
a.b/NOA
