Tiranë, 20 Prill NOA - Partia Demokratike (PD), reagoi sot pas deklaratave që bëri deputeti i Partisë Socialiste (PS), Erion Braçe që akuzoi qeverinë si të paaftë dhe larg premtimeve të dhëna katër vjet më parë.
Erla Mëhilli, zëdhënëse e PD, doli sot para medieve në një replikë me PS duke atakuar direkt, kryetarin Edi Rama.
"Lidhur me deklaratat e Ramës të bëra me gojën e Braçes së tij se PD nuk ka mbajtur premtimet, ne i tregojmë se çfarë kemi bërë, tha Mëhilli.
Më tej, ajo plotësoi: "Anëtarësimi i Shqipërisë në NATO, dyfishimi i rrogave të pensioneve në fshat, përfundimi i MSA-së, dyfishimi i buxhetit për arsimin dhe numrit të studentëve apo përfundimi i mijërave kilometra rrugë janë disa nga dëshmitë e premtimeve të mbajtura të kësaj mazhorance që tmerrojnë e lënë pa gjumë prej muajsh Ramën dhe Bracen e tij".
Për PD, Edi Rama, "me një tellall si Braçja, ka vetëm një qëllim, të zhurmojë vjedhjen e papërmbajtur të taksave të katërfishuara të gjelbërimit dhe pastrimit në Tiranë, si dhe të zhurmojë aktin e paprecedent të marrjes në një mbledhje të vetme të 19 lejeve të ndërtimit duke shënuar kështu rekordin e vjedhjeve dhe korrupsionit në historinë e Shqipërisë".
e.l/NOA
