Vlorë, 21 prill, NOA - 6 muaj burg dhe 5 milionë lekë gjobë. Ky është dënimi që Gjykata e Vlorës i ka dhënë gjatë seancës së sotme kryebashkiakut të Himarës, Vasil Bollano.
Lajmi bëhet i ditur për agjencinë e Lajmeve NOA nga burime brenda kësaj gjykate, të cilat konfirmojnë ndër të tjera se ky organ ka ndërmarrë edhe masën e ndalimit të ushtrimit të profesionit prej tij për tre vite me radhë në administratën publike.
Ndërkaq, pretenca e paraqitur nga prokurori i çështjes, Sokol Malaj, ka qenë për dënimin me 1 vit burg dhe një gjobë prej 5 milion lekësh.
Sipas të dhënave, kryebashkiaku Bollano akuzohej për shpërdorim detyre, pas veprimit të urdhëruar prej tij për heqjen e tabelave në aksin rrugor Llogara-Qeparo, me pretendimin se ato duheshin shkruar edhe në greqisht.
Për vendosjen e tabelave është organizuar tenderi prej 5.3 milion lekë, i zhvilluar nga Ministria e Punëve Publike, Transportit dhe Telekomunikacionit, me objekt vendosjen e sinjalistikës rrugore në aksin rrugor Orikum-Himarë-Sarandë -Butrint.
Gjatë punës së saj kjo firmë fituese e tenderit AGE&CO shpk ka hasur probleme me kryebashkiakun Bollano.
n.e/NOA
