Shkozet 21 prill NOA - Shkëmbim me armë zjarri mes dy grupeve, plumbat depërtojnë në një autobus që po kalonte duke lënë të plagosur një pasagjer.
Ngjarja ndodhi rreth orës 16:00 të ditës së sotme në Shkozet të Durrëzit, kur disa persona janë përfshirë në përleshje me armë pas një sherri mes tyre.
Për pasojë plumbat kanë depërtuar në një autobus i cili po kalonte në atë moment në rrugë.
Mësohet se një plumb ka prekur një person që ndodhej pasagjer në autobus, duke e plagosur.
Forcat e policisë të sinjalizuara për ngjarjen mbërritën menjëherë për të zbardhur rrethanat e ngjarjes.
Burime nga policia thanë për agjencinë NOA se kanë qenë disa persona të ndarë në dy grupe të cilët janë përleshur me njëri-tjetrin. Ata kanë përdorur armët dhe për pasojë një plumb ka shkaktuar plagosjen e një personi që ndodhej në një autobus i cili po kalonte në rrugën ku ndodhi ngjarja.
Sipas të njëjta burimeve, policia ka nisur kontrolle nëpër banesat e të dyshuarve ndërsa janë shoqëruar disa persona për të zbardhur autorët dhe motivet e këtij konflikti me armë.
k.k/NOA
