Tiranë, 25 prill, NOA - Ditën e zgjedhjeve, më 28 qershor, nuk do të ketë asnjë ndërprerje të energjisë elektrike në të gjithë vendin, në mënyrë që të mos krijohet asnjë shteg i mundshëm për vjedhjen e votave, por edhe të sigurohet një mbarëvajtje e procesit zgjedhor.
Ky fakt qëndron në bazë të marrëveshjes që u firmos sot nga kreu i Komisionit Qendror të Zgjedhjeve, Arben Ristani e nënkryetarja Dëshira Subashi dhe drejtuesi i Operatorit të Sistemit të Shpërndarjes së Energjisë, Sahit Dollapi.
Ky i fundit ka garantuar nga ana e institucionit që drejton furnizim pa ndërprerje me energji në të gjithë Shqipërinë ditën e zgjedhjeve, si edhe gjeneratorë të lëvizshëm për qendrat e votimit, të cilët gjithsesi mund të jenë të nevojshëm për ndonjë rast emergjent atë ditë. Kjo marrëveshje e Komisionit Qendror të Zgjedhjeve, pason atë që nënshkroi me Këshillin Kombëtar të Radio-Televizoneve për kohën televizive të aktiviteteve të partive politike gjatë fushatës elektorale.
n.e/NOA
