Uashington, 6 maj, NOA - Procesi i votimit për ta pranuar Kosovën si anëtare me të drejta të plota në organizimin prestigjioz financiar të Fondit Monetar Ndërkombëtar ka rezultuar i suksesshëm. Me 100 vota pro, ajo konsiderohet tashmë si anëtarja më e re e organizatës së njohur botërore për financat.
Nga 185 vende anëtare, afro 100 vende kanë votuar për pranimin e Kosovës, rezultat ky i cili do t'i paraqitet sot Bordit të Drejtorëve Ekzekutivë të FMN-së, ndërsa zyrtarisht do të bëhet i ditur të premten.
Në një konferencë për media, Ministri i Ekonomisë Ahmet Shala dje bëri të ditur se anëtarësimi i Kosovës nuk do të ketë drejtpërdrejt pagesë të menjëhershme prej 65 milionë eurosh në FMN duke theksuar se Kosova mund të tërheqë kredi të buta nga FMN-ja.
Shala vlerësoi se anëtarësimi i Kosovës në FMN është parakusht për anëtarësim në çdo institucion tjetër financiar ndërkombëtar. Sipas tij anëtarësimi në fond hap dyert për anëtarësim edhe në Bankën Botërore.
n.e/NOA
