Tiranë, 6 maj NOA - Presidenti i Republikës, Bamir Topi priti sot në mjediset e Pallatit të Brigadave, Ministrin e Mbrojtjes së Hungarisë, Imre Szekeres dhe delegacionin që e shoqëronte në kuadër të vizitës së tij në vendin tonë.
"Në këtë momente", - tha Presidenti Topi, - "si vend anëtar i Aleancës më të madhe të paqes dhe të sigurisë në botë, ne jemi të gatshëm dhe të ndërgjegjshëm për nevojën e rritjes së standardeve të bashkëpunimit me vendet partnere të NATO-s, në përmbushje të misioneve të rëndësishme të saj".
Topi bëri një panoramë të zhvillimeve të brendshme, duke u ndalur në mënyrë të veçantë në fazën parapërgatitore të procesit elektoral për zgjedhjet e përgjithshme parlamentare, "të cilat", - vuri në dukje Presidenti, - "janë një tjetër sfidë madhore dhe përballimi i saj me sukses është një hap i sigurt dhe tepër i rëndësishëm përpara në rrugën tonë për integrimin në Bashkimin Evropian, duke përmbushur kështu dhe prioritetin tonë të dytë madhor".
Në vijim të bisedës, kryetari i shtetit vuri në dukje vijimësinë e reformave për transformimin dhe modernizimin e Forcave tona të Armatosura, po ashtu për përgatitjen e kuadrove të kualifikuar dhe profesionistë.
"Tashmë që Shqipëria u bë edhe de jure anëtare e Aleancës, kjo na imponon të vazhdojmë të shprehim gatishmërinë tonë gjatë misionit tonë të përbashkët për paqe dhe siguri, si dhe besnikërinë e profesionalizmin që na karakterizon si aleatë", - tha Presidenti.
Nga ana e tij, Ministri i Mbrojtjes së Hungarisë, Imre Szekeres tha se "ne e shikojmë Shqipërinë si faktor qëndrueshmërie në rajon dhe e vlerësojmë shumë politikën e saj të kujdesshme e të moderuar në Ballkan".
e.l/NOA
