Tiranë, 8 maj NOA - Kryeministri Berisha dhe Sekretari i Përgjithshëm i NATO-s, Jaap de Hoop Scheffer dhanë sot një prononcim për shtyp, pas takimit të zhvilluar mes tyre.
"Me sekretarin e Përgjithshëm të NATO-s zotin Jaap de Hoop Scheffer ne diskutuam mbi marrëdhëniet e Shqipërisë me NATO-n, diskutuam mbi gjendjen në rajon, gjithashtu diskutuam ndër të tjera, për zgjedhjet  e ardhshme. E informova zotin Scheffer për të gjitha përpjekjet e qeverisë për një kuadër ligjor dhe teknik më të mirin që ka pasur ndonjëherë vendi dhe përkushtimin e plotë dhe total të qeverisë, për një proces zgjedhor të lirë dhe të ndershëm" u shpreh Berisha.
"Është hera e parë që vij në Shqipërinë, që tashmë është pjesë e NATO-s.  Ishte një vendim shumë i rëndësishëm i marrë nga krerët e NATO-s në muajin prill. Në fakt ka pasur arsye, për të cilën unë them se ka qenë një vendim i rëndësishëm. Ka pasur gjithmonë një kontradiktë brenda NATO-s, për anëtarësimin e vendeve të Ballkanit, por kjo është e vetmja rrugë për këto vende, që ato të arrijnë integrimin euroatlantik, është e vetmja rrugë drejt stabilitetit dhe sigurisë në vend" deklaroi Sekretari i Përgjithshëm i NATO-s.
Sipas tij, Shqipëria do të marrë pjesë patjetër në diskutimet që do të bëhen në NATO, për themelimin e një koncepti strategjik të NATO-s, që është shumë e rëndësishme.
k.k/NOA
