Tiranë, 8 maj, NOA - 8 Maji njihet në të gjithë botën si Dita Ndërkombëtare e Talasemisë, në të cilën zhvillohen aktivitete të gjera për sensibilizimin e popullatës të ndihmojë kategoritë e prekura nga kjo sëmundje e rëndë.
Bëhet e ditur për agjencinë e Lajmeve NOA se me rastin e kësaj dite, në mjediset e Muzeut Kombëtar, do të organizohet takimi "Jeta është e shtrenjtë, kujdesu për të. Jeta është e çmuar, mos e shkatërroni atë. Dhuroni gjak", në të cilin do të jetë pjesëmarrëse edhe ministrja e Shëndetësisë, Anila Godo.
Talasemia është një nga sëmundjet gjenetike më të përhapura në botë, ku sipas një studimi të OBSH-së, çdo vit lindin më tepër se 100.000 fëmijë të prekur nga kjo sëmundje.
Kjo sëmundje është një çrregullim i trashëguar i gjakut dhe shoqërohet me uljen e  sasisë së hemoglobinës (rruazave të kuqe) në trupin e njeriut dhe mund të sjellë në këtë mënyrë si rezultat, pamundësinë që rruazat e kuqe të çojnë në mënyrë të mjaftueshme oksigjen atje, ku ai është i nevojshëm.
Kjo shkakton anemi (pagjakësi) dhe ne rast se nuk mjekohet, zemra dhe organe të tjera në trup do të "mbarojne" së funksionuari, si rezultat i mungesës së oksigjenit. Transfuzioni i rregullt i gjakut është i vetmi mjekim i përshtatshëm deri tani për talaseminë. Ai duhet të merret çdo 3-4 javë, në bazë të nevojave të pacienteve që duhet të bëjnë medoemos analiza laboratorike në spitale, ambulancë apo qendra të tjera shëndetësore, për të ditur përqindjen e hemoglobinës së tyre, edhe në rast se nuk kanë shfaqje të dukshme, si lodhje apo zbehtësi të fytyres (anemi).
Transfuzioni i gjakut synon të mbajë nivelin e hemoglobinës pothuajse normal, duke zëvendësuar rruazat e kuqe "boshe", me të reja të shëndetshme. n.e/NOA
Â
