Tiranë, 9 maj NOA - Një shifër e saktë mbi personat e prekur nga sëmundjet nervore ose siç quhet, neurologjia, as që ekziston jo vetëm për Shqipërinë, por edhe për tërë vendet e Mesdheut.
Ky fakt është pranuar sot në qytetin e Durrësit ku u zhvillua sot, Konferenca Ndërkombëtare Mesdhetare e Neurologjisë.
Neuromesdheu është një projekt që synon bashkërendimin e veprimtarisë së vendeve mesdhetare në fushën e neurologjisë.
Sipas statistikave të publikuara në këtë Konferencë, nuk ka ende asnjë shifër të saktë mbi numrin e të prekurve nga neurologjia.
Ky projekt sipas shefes së shërbimit universitar të neurologjisë Jera Kruja, ka si qëllim jo vetëm organizimin e mbledhjeve vjetore shkencore, por gjithashtu edhe bashkëpunim më të ngushtë në fushën e studimeve kërkimore shkencore si dhe njohjen dhe këmbimin e vlerave kulturore.
Në qendër të vëmendjes të kësaj Konference ishte hartimi i formave të ndryshme të bashkëpunimit si edhe të shkëmbimit të eksperiencave, me qëllim përmirësimin e shërbimit ndaj pacientëve të prekur nga sëmundja e neurologjisë.
E pranishme në këtë konferencë ishte ministria e shëndetësisë Anila Godo, specialistë të fushës së neurologjisë në Shqipëri si dhe në Mesdhe.
Në fjalën e saj Godo vlerësoi se kjo konferencë do të sjellë standard të ri dhe një performancë të re për neurologjinë.
Më tej ajo deklaroi se zhvillimi i botës kërkon një bashkëpunim të plotë, pasi nuk mund të ketë integrim në Evropë pa sistem shëndetësor.
Ministria e shëndetësisë, u përqendrua veçanërisht në rritjen e shërbimit të standardeve të pacientëve dhe ne furnizimin me medikamente.
Gjithashtu, Godo vuri theksin mbi krijimin e strategjive të përbashkëta më vendet e tjera të Mesdheut dhe të rajonit ballkanik.
Tre ishin pikat ku u fokusuan të pranishmit për sa i përket fushës së neurologjisë, shkëmbim përvoje mes ekspertëve, bashkërendim të veprimtarisë si dhe kërkime shkencore.
e.l/NOA
