Tiranë, 10 maj NOA - Nënkryetari i Grupit Parlamentar të Partisë Socialiste (PS), Erion Braçe, doli sot para portës qendrore të Kryeministrisë ku akuzoi se ky institucion është shndërruar në objekt aferash familjare.
Braçe shprehu ato që i cilësoi shqetësime lidhur me korrupsionin, me klientelizmin, me konfliktin e interesave dhe natyrisht me përfitimet e paligjshme, gjatë gjithë këtyre tre viteve të fundit.
"Pikërisht masiviteti, përhapja dhe përfshirja në këtë listë të gjatë e fenomeneve negative, korruptive dhe të përfitimeve të paligjshme të qeverisë së Republikës së Shqipërisë, ka bërë që godina, para së cilës jemi sot, të mos jetë më selia e qeverisë së qytetarëve, por të jetë selia apo shtëpia e mëkatarëve, pasi nga dita në ditë, përfaqësuesit e kësaj selie shtojnë mëkatet e tyre në kurriz të qytetarëve shqiptarë", - tha deputeti i PS.
Ai shtoi se "dokumentet e publikuara sot në disa të përditshme, korrespondenca e publikuar sot, mes vajzës së kryeministrit ee bizneseve private, me qëllim përmbylljen e një marrëveshjeje të qartë me vendim qeverie, biznesin e saj, e këtij biznesmeni privat, dëshmojnë më së miri se vendimmarrja e qeverisë së Republikës së Shqipërisë nuk është më vendimmarrje në përputhje me Kushtetutën e Republikës së Shqipërisë, por është një vendimmarrje në përputhje me klientët e qeverisë së Republikës së Shqipërisë dhe përfitimet e paligjshme të familjes biologjike të kryeministrit dhe në konflikt të pastër interesi".
Sipas deputetit socialist, "kemi dokumente që dëshmojnë që një biznes i madh regjistrohet si biznes i vogël, pavarësisht tarifave marramendëse që aplikon, ndërkohë që, pikërisht që paratë që duhet të mblidhen dhe që evazohen nga ky biznes familjar i kryeministrit, kanë filluar t'u mblidhen me 10% mësuesve, pedagogëve, mjekëve, infermierëve, policëve dhe gjithë punonjësve të ndershëm të administratës së shtetit, që prej muajsh taksohen me 10%".
e.l/NOA
