Petrelë, 11 maj NOA - Kryeministri Sali Berisha mori pjesë dje pasdite në inaugurimin e përfundimit të punimeve për ujësjellësin e ri të komunës Petrelë, dhe më pas zhvilloi një takim me banorët e kësaj komune.
Berisha u premtoi banorëve të komunës së Petrelës se në mandatin e dytë qeveria e tij do të financojë çdo projekt në këtë komunë, në mënyrë që ajo të shndërrohet në një nga qendrat më të rëndësishme turistike të kryeqytetit, duke përmirësuar dhe jetën e tyre.
"Rrugën, nga Mulleti deri këtu do ta rindërtojmë, me dy korsi, me ndriçimin më të bukur, me trotuare, me veprat e artit dhe çdo gjë tjetër. Sikundër, do ndërtojmë rrugën nga këtu dhe te Kalaja e vjetër e Siopit, në mënyrë që të lidhim këto dy qendra të rëndësishme historike" u shpreh kryeministri para banorëve të komunës së Petrelës.
"Unë do të garantoj mbështetjen dhe financimin e qeverisë edhe sikur ju të siguroni 500 hektar ullishte. Prandaj, ju bëj thirrje ju dhe këshillit komunal, të bashkëpunoni me fermerët dhe të përcaktoni sipërfaqet e reja për ullishte. Vetëm në këta katër muaj, nga iniciativa dhe nxitja e qeverisë, në Shqipëri janë mbjellë 2 milionë rrënjë ullinj. Ne jemi zotuar se në 4 vitet e ardhshme do të financojmë mbjelljen e  20 milionë rrënjë ullinj. Le të punojmë së bashku për ta tejkaluar këtë shifër" shtoi më tej Berisha.
Sipas tij, programi i qeverisë së tij është program fund e krye i interesave të popullit.
"Kurrë nuk kam dëgjuar që një opozitë të thotë të mos rriten rrogat e pensionet. Ajo nisi konferencat e shtypit për të than që nuk duhet t'i rrisni rrogat e pensionet. Por, përse ne nuk duhej të rrisnim rrogat e pensionet? Për çfarë i paskemi ne paratë, nëse taksat e qytetarëve nuk ua kthejmë në rroga e pensione. Çfarë alternative është ajo që të bërtasësh mos rrit rrogat e pensionet?" deklaroi kryeministri.
k.k/NOA
