Korçë, 12 maj/NOA Update- Policia dyshon se polici i burgut është vet plagosur me dashje dhe jo nga pakujdesia ashtu si rezultoi nga hetimet e para.
Lajmin e bëjnë të ditur për agjencinë e lajmeve NOA, burime nga policia të cilat treguan se 38-vjeçari Olsi Rexhollatri polic i burgut të sigurisë së lartë në Drenovë, konsumonte alkool prej kohësh ndërsa njihej si frekuentues i lojërave të fatit.
Policia dyshon nëse gardiani kishte borxhe të pashlyera për shkak të frekuentimit të lojërave të fatit e basteve sportive gjë e cila mund ta ketë detyruar atë të tentojë të vetëflijohet.
Megjithatë deri më tani gjithçka mbetet në kuadrin e dyshimit sipas policisë, pasi hetimet po vazhdojnë ende për të zbardhur të vërtetën.
Ngjarja ku mbeti i plagosur gardiani ndodhi pak pas mesnatës duke u gdhirë dita e sotme kur ai është kthyer i dehur në shtëpi.
Ai ka hyre në dhomën e tij fill pasi ka shkuar në banesë, dhe pak çaste me vonë, nëna e gardianit ka dëgjuar një krismë.
Menjëherë ajo ka shkuar në dhomë ku ka gjetur të gjakosur djalin ndërsa e alarmuar lajmëroi policinë.
Fillimisht i plagosuri i transportua në spitalin e Korçës ku pas ndërhyrjes së parë ai u dërgua në Spitalit Ushtarak në Tiranë.
Policia ka marrë në pyetje nënën e policit e cila ka treguar ngjarjen të detajuar.
Sipas saj, djali ishte kthyer i dehur në shtëpi dhe menjëherë ka hyrë në dhomën e tij.
Por vetëm pak minuta më pas ajo ka dëgjuar krismën dhe ka parë të birin të mbytur në gjak.
Policia e Korçës bën të ditur se i marrë në pyetje, polici 38Â vjeçar ka deklaruar se ishte i dehur dhe arma i ishte shkrehur nga pakujdesia .
Por pavarësisht deklarimeve të tyre policia po vazhdon hetimet për të zbardhur rrethanat e kësaj ngjarjeje.
k.k/NOA
