Prishtinë, 12 maj NOA - Drejtori i Përgjithshëm i Policisë së Republikës së Kosovës, urdhëroi pasditen e sotme, shtimin e masave te sigurisë në objektet shtetërore, informon bashkëpunëtori i agjencisë së lajmeve NOA në Prishtinë.
Vendimi, vjen duke u bazuar në vlerësimet për kërcënime për sigurinë kombëtare nga Këshilli i Sigurisë së Republikës së Kosovës në takimin e mbajtur më 8 maj të këtij viti dhe si rezultat i ngjarjeve të fundit të kërcënimeve ndaj objekteve të institucioneve shtetërore.
Drejtori i Përgjithshëm i Policisë së Kosovës, Sheremet Ahmeti konfirmoi sot se ka lëshuar urdhëresë për shtimin e masave të sigurisë në të gjitha objektet e institucioneve shtetërore të Republikës së Kosovës.
Zyra për Informim e Policisë së Kosovës, citon urdhrin të thuhet se obligohet i gjithë personeli i Policisë së Kosovës që të shtojnë vigjilencën dhe kujdesin maksimal në sigurinë e objekteve shtetërore.
Në të gjitha rastet kur vërehet apo vërtetohet se kjo urdhëresë nuk është duke u respektuar, do të merren masat e nevojshme sipas ligjit në fuqi. Me qëllim të rishikimit të politikave të sigurisë së objekteve shtetërore përfshirë edhe objektet e Policisë së Kosovës, me vendim të Drejtorit të Përgjithshëm themelohet një grup i veçantë pune.
Ai do të ketë për detyrë që të rishikojë dhe t'i hartojë të gjitha politikat e nevojshme për masat mbrojtëse të sigurisë për sigurimin e objekteve, ndërkohë që do t'i jep edhe rekomandimet e nevojshme.
a.b/NOA
