Prishtinë, 13 maj, NOA - Autoritetet e policisë në Kosovë u vunë paraditen e sotme në alarm, pas një paralajmërimi me një E-mail përmes postës elektronike se mjediset e Ministrisë së Arsimit ishte vënë një bombë, e cila priste të shpërthente nga momenti në moment.
Kjo letër e mbërritur në adresë në Policisë, ka alarmuar forcat e rendit, përfshirë edhe ato të KFOR-it, të cilat janë të pranishme në Kosovë.
Letra me paralajmërim për vendosjen e një mjeti shpërthyes në ndërtesën e Ministrisë së Arsimit, Shkencës dhe Teknologjisë, ka bërë që policia të zbrazë tërë objektin i cili ndodhet në lagjen "Dardania" në kryeqytet. Sipas të dhënave, rreth orës 10.00 të paradites, objekti i ministrisë së Arsimit dhe Shkencës në Kosovë, ishte i rrethuar nga forcat e policisë dhe ato të KFOR-it, ndërsa gjithë punonjësit janë larguar nga ndërtesa. Ky është kërcënimi i dytë brenda një jave që bëhet ndaj ndërtesave qeveritare.
Të mërkurën e kaluar, një kërcënim i ngjashëm kishte detyruar policinë që të evakuojë gjithë personelin e ndërtesës kryesore të qeverisë dhe atë të Ministrisë së Shërbimeve Publike. Pas rreth 5 orësh kontrolli ishte vërtetuar se alarmi ishte i rremë.
n.e/NOA
