Bruksel, 18 maj, NOA - Komisioni Evropian publikon sot raportin mbi vlerësimin e vendeve anëtare të Bashkimit Evropian për progresin e vendeve kandidate në lidhje me liberalizimin e vizave.
Ka për të qenë në fakt një mendim i përgjithshëm i Komisioni Evropian për mënyrën se si duhet të plotësohen reformat e domosdoshme në rajonin e Ballkanit dhe ai do të publikohet zyrtarisht më pas në 25 maj në Bruksel në nivel të ambasadorëve.Ndërkaq, bëhet e ditur se rekomandimi për heqjen e vizave mund të pritet në muajin qershor.
Pasi Komisioni Evropian të rekomandojë heqjen e vizave, duhet të pritet vendimi i Këshillit Evropian, i cili pritet të ndodhë në fund të këtij viti, ose në pjesën e parë të vitit 2010.
Por sipas burimeve diplomatike, disa shtete të Bashkimi Evropian kanë shprehur rezerva të mëdha për liberalizimin e vizave.
Njëra prej tyre është Gjermania, e cila siç bëhet e ditur, edhe brenda raportit që pritet të publikohet, ka për të shprehur qëndrim të rezervuar në lidhje me liberalizimin e plotë të vizave për vendet e Ballkanit.
Ndërkaq, një dokument konfidencial paraprak paralajmëron se Shqipëria nuk i ka përmbushur të gjitha kriteret për hedhjen e këtij hapi.
Mbi lëvizjen e lirë, ky dokument vlerëson se janë bërë disa progrese, por se nevojitet përmbushja e plotë e kritereve në të gjitha fushat e specifikuara në udhërrëfyes.
Deri më tani, burime diplomatike njoftojnë se vendet më të favorizuara për liberalizimin e plotë të regjimit të vizave, janë Maqedonia dhe ndoshta Serbia e Mali i Zi, ndërsa Shqipëria dhe Bosnja do të vlerësohen në kohën e duhur kur t'i përmbushin kushtet e duhura për liberalizimin e vizave.
n.e/NOA
