Tiranë, 18 maj, NOA - Konfindustria kërkon me ngulm ngritjen e Gjykatës Administrative, për të mundësuar zgjidhjen e konflikteve që tashmë ekzistojnë mes biznesit dhe strukturave shtetërore.
"Duke marrë shkak nga mundësia e rritjes së paarsyetuar të detyrimeve fiskale të biznesit, si pasojë e rivlerësimit të bilanceve, duke zbatuar sistemin e shumëpërfolur të referencave nga administrata fiskale, shqetësim i paraqitur së fundmi edhe nga përfaqësues të opozitës, kërkon edhe njëherë krijimin sa më të shpejtë të Gjykatave Administrative si institucionin e vetëm, i cili do të mund t'u japë zgjidhje të drejta edhe të çështjeve në fjalë", thuhet në një deklaratë për shtyp të këtij organizmi. Sipas saj, Konfindustria, u kërkon përfaqësuesve të opozitës, që të mos mjaftohen duke dhënë si zgjidhje të problemit shqetësues të rritjes së paarsyetuar të detyrimeve të biznesit vetëm duke u bërë thirrje publike nëpunësve tatimorë në interpretimin e ligjit, por të tregojnë me vepra se janë për zgjidhje të qëndrueshme, institucionale dhe afatgjatë, duke dhënë votat e tyre për të miratuar projekt-ligjin përkatës për të ndërtuar Gjykatën Administrative brenda legjislaturës në vazhdim deri në 28 maj 2009.
n.e/NOA
