Tiranë, 19 maj NOA - Në seancën gjyqësore të radhës, për çështjen "Hoxha" ka dëshmuar sot ish-roja i vilës në Vain të Lezhës që njihej si bazë e SHIK-ut.
Viktor Sokoli, ka dhënë sot një dëshmi të fortë në procesin për zhdukjen e biznesmenit shqiptaro- maqedonas, Remzi Hoxha.
Sokoli ka dëshmuar pa praninë e kamerave, duke treguar para Gjykatës së Krimeve të Rënda, se ka qenë dëshmitar dhe në këtë vend silleshin persona të mbuluar me thes në kokë.
Në dëshminë e tij, roja i bazës ka përmendur edhe emra konkrete.
Sokoli ka deklaruar para trupit gjykues se kishte parë një oficer të SHIK-ut me emrin Budjon që kërcënonte Remzi Hoxhën.
Madje këtë dëshmi roja tha në gjykatë, se ia kishte treguar edhe drejtorit të bazës së Vainit, dy vjet më vonë.
Dëshmia e ish-rojës së bazës është cilësuar si më e forta dhënë deri më tani para trupit gjykues për procesin gjyqësor për zhdukjen e biznesmenin shqiptaro-maqedonas, Remzi Hoxha i cili u zhduk në rrethana misterioze në vitin 1995.
Mësohet se në procesin gjyqësor ndaj ish-punonjësve të SHIK-ut, prokurori i çështjes kërkoi dëshmitar, shtetasin kosovar Shaqa Shatri, kërkesë të cilën gjykata nuk e pranoi.
k.k/NOA
