Prishtinë, 25 maj/ NOA - Është miratuar sot, Rezoluta për Kosovën, në sesionin e 33 të Këshillit Islamik të ministrave të jashtëm të Organizatës së Konferencës Islamike që po mbahet në Damask të Sirisë.
Rezoluta ka vlerësuar zhvillimet dhe progresin e Kosovës pas pavarësisë, ka përshëndetur po ashtu rikonfigurimin e UNMIK-ut, shtrirjen e EULEX-it në të gjithë Kosovën.
Ndërkaq i bëhet thirrje Bashkësisë Ndërkombëtare të ndihmojë zhvillimin e Kosovës. Mes të tjerash në këtë rezolutë i kërkohet sekretarit të përgjithshëm të Organizatës së Konferencës Islamike që t'i raportojë këtij organizmi për zhvillimet në Kosovë.
Ministri i Punëve të Jashtme i Kosovës, Skënder Hyseni ka përshëndetur votimin e Rezolutës. Në një komunikatë për opinion të Ministrisë së punëve të Jashtme thuhet se "menjëherë pas kalimit të rezolutës, ministri Hyseni është njoftuar për lajmin nga ministri i Punëve të Jashtme i Republikës së Shqipërisë, Lulzim Basha".
"Ministri Hyseni e falënderon në mënyrë të veçantë z.Basha dhe diplomacinë shqiptare për punën e bërë rreth hartimit të kësaj rezolute si dhe të votimit të saj", thuhet në komunikatë.
Hyseni konsideron se miratimi i kësaj rezolute është i rëndësishëm për proceset në Kosovë, pasi do të ndihmojë shumë nga vendet e Organizatës së Konferencës Islamike për të ndërmarrë hapin e njohjes së Kosovës.
a.b/NOA
