Tiranë, 3 qershor NOA - Partia Socialiste i kujtoi sot kryeministrit Sali Berisha, faktin se katër vite më parë, premtoi se do të ndihmonte të sëmurët që jetojnë në këtë vend.
"Berisha premtoi që do të ulte kostot e shëndetësisë, duke eliminuar TVSH-në për shërbimet mjekësore, në mënyrë që të ndihmonte të sëmurët të përballonin kujdesin mjekësor për të cilin kishin nevojë e të cilin meritonin", - tha përfaqësuesja e PS, Elisa Spiropali.
"Fatkeqësisht, Berisha zhgënjeu të sëmurët e këtij vendi, ai shkeli premtimin që u kishte bërë atyre. TVSH-ja për shërbimet mjekësore mbeti e pandryshuar në 20 për qind", - vijoi Spiropali.
Ajo komentoi se shqiptarët po vuajnë, sepse nuk mund të përballojnë dot situatën e sotme në spitalet e vendit.
"Sëmundjet e lehta për t'u kuruar kthehen në vdekjeprurëse, sepse njerëzit nuk mund të sigurojnë një takim me mjekun apo kirurgun. Familjet shqiptare po shkatërrojnë ekonomitë e tyre, për të mbajtur gjallë të dashurit e tyre", - konstatoi ajo.
e.l/NOA
