Tiranë, 7 qershor NOA - Kryetari i partisë "Lëvizja e Legalitetit" Ekrem Spahiu prezantoi në pallatin e kulturës "A. Moisiu" të qytetit të Durrësit 14 kandidatët e listës shumëemërore të PLL për këtë qark.
Në këtë takim mori pjesë dhe përshëndeti edhe Kryetari i Shoqatës mbarë kombëtare të ish të Burgosurve dhe Përndjekurve Politikë Adem Allçi.
Ai shprehu mbështetjen e plotë që kjo shoqatë dhe gjithë ish të Burgosurit dhe përndjekurit Politikë i japin partisë "Lëvizja e Legalitetit" për zgjedhjet e 28 qershorit 2009.
Kryetari i PLL Ekrem Spahiu tha se partia që ai drejton, ka si prioritete çështjen kombëtare, zgjidhjen përfundimtare të çështjes së pronave, dëmshpërblimin dhe integrimin e plotë të ish-të burgosurve dhe përndjekurve politikë.
Por Spahiu theksoi se këto do të bëhen "duke mos lënë mënjanë edhe probleme të tjera që shqetësojnë shoqërinë shqiptare".
Spahiu tha gjithashtu se Partia "Lëvizja e Legalitetit" do të kërkojë që shteti të njohë gabimet e veprimeve apo mosveprimeve të tij në lidhje me çështjen e pronave.
Kurse shtoi se PLL angazhohet që brenda një mandati qeverisës, t'i japë zgjidhje përfundimtare kësaj çështjeje duke ua kthyer apo kompensuar me vlerën e tregut të gjithë pronarëve të ligjshëm që deri më sot nuk kanë mundur të disponojnë pronën e tyre".
v.m/NOA
Kandidatët e PLL në Durrës:
Hysen Myshketa, Rovena Taga, Kastriot Goci, Islam Aliko, Ahmet Duka, Anisa Mehja, Enver Kaloshi, Arianit Kurti, Eduard Allamani, Edmond Myrto, Hazbi Biçaku, Ela Allkja, Arben Mera dhe Anila Biba.
