Shkodër, 23 qershor NOA - Nënkryetarja e Partisë Demokratike, Jozefina Topalli ka qenë sot sërish në qarkun e Shkodrës.
Në takimin me banorët, Jozefina Topalli tha se gjatë mandatit të dytë do të pesëfishohen subvencionimet në projektet e zhvillimit të bujqësisë, dhe pensionet e fshatit do të barazohen me pensionet e qytetit.
Do të shumëfishohen investimet në bujqësi e blektori, shkolla, qendra shëndetësore, sisteme moderne të vaditjes.
Ditën e sotme Topalli ka qenë në kompleksin e fasonerisë ku janë të punësuara rreth 1 mijë punëtore dhe përuroi një prej fabrikave të reja.
"Mandati i dytë, do të jetë mandati i revolucionit industrial dhe i punësimit. Katër vitet e ardhshme më shumë do të bëhet për të lehtësuar procedurat hapjen e bizneseve të reja, duke mundësuar rritjen e punësimit" tha Topalli.
Më tej Kryetarja e Kuvendit mori pjesë në një takim me infermiere dhe doktorë të sistemit shëndetësor në Shkodër.
"Unë ndihem mirë, për faktin që infermierëve u është dyfishuar rroga, po ashtu edhe mjekëve. Jam tërësisht e ndërgjegjshme se kjo rritje duhet të vazhdojë dhe do të vazhdojë në mandatin tonë të dytë, " tha Kryetarja Topalli.
Ajo theksoi se reforma në shëndetësi është reforma më e vështirë, më e shtrenjtë në të cilën shumë herë shumë qeveri dështojnë.
Gjatë katër viteve të kaluara buxheti për shëndetësinë është dyfishuar nga 62 miliardë lekë në 137 miliardë lekë. k.k/NOA
