Tiranë, 24 qershor NOA - Autoritetet shqiptare kanë vendosur që të përurojnë ditën e nesërme më 25 Qershor, hapjen e trafikut të rrugës Durrës-Kukës-Morinë, kur sipas kompanisë Bechtel-Enka, përfundimi i rrugës daton jo më parë se viti 2010.
Burime zyrtare nga Këshilli i Ministrave, i thanë sot agjencisë së lajmeve NOA se në axhendën e nesërme është parashikuar që festimet të nisin në orën 11.00 me koncertin festiv në fillim të rrugës në Rrëshen, pranë mbikalimit të parë të rrugës.
Kryeministri i Shqipërisë Sali Berisha, i Kosovës Hashim Thaçi dhe i Turqisë Rexhep Taip Erdogan do të përshkojnë së bashku një pjesë të rrugës në këmbë dhe më tej, do të ngjiten në skenë për të mbajtur fjalët e rastit.
Më tej, Kryeministrat Berisha, Thaçi dhe Erdogan, do të presin që të tre, shiritin e inaugurimit të rrugës.
Zyrtarisht, qeveria tha se ceremonia, për efekt performance dhe sigurie teknike do të transmetohet Live nga televizioni Klan, duke ftuar mediat e tjera të kontaktojnë për marrjen e sinjalit.
e.l/NOA
