Â
Tiranë, 14 Korrik NOA - Kryetarja e Kuvendit të Shqipërisë, Jozefina Topalli i dërgoi sot një letër urimi Presidentit të ri të zgjedhur të Parlamentit Evropian, zotit Jerzy Buzek.
Në letrën e saj drejtuar z. Buzek, Kryetarja e Kuvendit, në emër edhe të Kuvendit të Shqipërisë, i bën urimet për zgjedhjen si President i Parlamentit Evropian.
Në letër evidentohet se Shqipëria ka bërë së fundmi një progres të jashtëzakonshëm.
"Ajo është sot anëtare me të drejta të plota e NATO-s. Në sajë të reformave të gjithanshme, ekonomike e ligjore ne arritëm të përmbyllim fazën e ratifikimit të MSA-së në një kohë rekord duke bërë të mundur në prill dorëzimin e kërkesës për statusin e vendit kandidat në BE", - thotë Topalli në letrën e saj.
Pajisja e qytetarëve me kartat e identitetit, nisja e procesit të pajisjes me pasaportat biometrike, por edhe rezultatet e qarta në luftën ndaj krimit e korrupsionit janë hapa që tregojnë vullnetin tonë maksimal për përmbushjen e aspiratës evropiane të shqiptarëve".
"Qytetarët shqiptarë, janë dhe ndihen qytetarë të Evropës. Ata meritojnë të jenë pjesë e familjes evropiane dhe për realizimin e kësaj ëndrre, ne besojmë fort në mbështetjen tuaj i nderuar z. Buzek, edhe për faktin se ju vini nga një vend që e kupton më së miri këtë aspiratë", vijon Topalli në letrën e saj.
Po ashtu, Kryetarja e Kuvendit fton Presidentin e ri të Parlamentit Evropian, për një vizitë zyrtare në Shqipëri.
a.k/NOA
