Burrel, 17 korrik, NOA - Në vizitën që ka kryer ditën e djeshme në qytetin e Burrelit, Kryeministri Berisha ka përuruar dhe fillimin e punimeve për ndërtimin e rrugës Mat-Muhërr, rrugë kjo që lidh rrethin e Matit me atë të Dibrës.
Kjo rrugë me gjatësi prej 5 kilometrash dhe me një vlerë rreth 47 milionë lekë, pritet të mbarojë brenda 60 ditësh.
Në fjalën e tij Kryeministri tha se qeveria do të vazhdojë ndërtimin e një infrastrukture moderne dhe revolucionin industrial, si kusht vendimtar që Shqipëria të bëhet një ndër vendet më të zhvilluara në rajon dhe më gjerë.
Më tej Berisha u shpreh se "Kjo rrugë, e cila do të jetë e standardeve ndërkombëtare, do të ndihmojë banorët e këtyre komunave, nga Peshkopia në Burrel, për të dalë më lehtë në treg, duke bërë kështu të mundur normalizimin e transportit"
"Ne së bashku do të vazhdojmë projektet për një Shqipëri që katër vitet e ardhshme do të jetë një Shqipëri krejt tjetër, një Shqipëri evropiane", shtoi në fjalën e tij kreu i qeverisë, Berisha.
el/NOA
