Tiranë, 18 korrik NOA-Instituti i Sigurimeve e Kujdesit Shëndetësor ka vendosur të shpërblejë rreth 9 mijë mjekë, infermiere e staf mbështetës duke u dhënë një pagë shpërblim.
Nisur nga treguesit e mirë të performancës, punonjësit e qendrave shëndetësore në të gjithë vendin kanë përfituar këto ditë deri në një pagë shpërblim për 6-mujorin e parë të vitit.
"ISKSH është e vendosur të vijojë politikën e stimulimit të stafit mjekësor bazuar në punën dhe performancën e tyre, duke patur në këtë mënyrë në fokus pacientin dhe shërbimin ndaj tij", u shpreh drejtoresha e Përgjithshme e ISKSH-së, znj. Elvana Hana.
Pas rritjes së pagave deri në 17% për mjekët e familjes dhe deri në 21% për specialistët e cila hyri në fuqi që nga 1 maji 2009, punonjësit e qendrave shëndetësore përfituan shpërblimin e mesvitit i cili është shpërndarë tashmë mbi 200 qendra shëndetësore në vend dhe është në proces shpërndarjeje në qendrat e tjera.
Paga për mjekët në shërbimin shëndetësor parësor varion nga 46.000 lekë të reja në 78.000 lekë, ndërsa për personelin tjetër (infermiere, sanitare, shofere etj) varion nga 22.000-28.000 lekë.
Fondi në total i akorduar nga ISKSH në buxhetin e qendrave shëndetësore për shpërblimin e 6-mujorit është 290 milionë lekë të reja.
m.i/NOA
