Prishtinë, 18 korrik, NOA - Dje ishte data e fundit kur autoritetet kosovare duhet të dorëzonin në Gjykatën Ndërkombëtare të Drejtësisë, në Hagë, deklaratën e dytë me argumentet për pavarësinë e shpallur me 17 shkurt 2008.
"Dokumenti 160 faqesh siguron të gjitha faktet e nevojshme për mbrojtjen e legjitimitetit të pavarësisë së Kosovës si dhe u përgjigjet me fakte të mjaftueshme të gjitha pretendimeve që i kanë shtruar shtetet e caktuara në GJND kundër shpalljes së pavarësisë", deklaroi në një konferencë për shtyp, ministri i Jashtëm i Kosovës Skënder Hyseni.
Pas dorëzimit të deklaratave me shkrim, në Gjykatën Ndërkombëtare të Drejtësisë pritet që me 1 dhjetor të fillojnë seancat dëgjimore. Argumentet e para me shkrim për mbrojtjen e legjitimitetit të pavarësisë, Prishtina dhe Beogradi i kanë dorëzuar në GJND më 17 prill të këtij viti.
n.e/NOA
