Tiranë, 21 korrik, NOA - Kolegji Zgjedhor, i ngritur pranë Gjykatës së Apelit në Tiranë, nis sot seancat e shqyrtimit të ankimimeve të partive politike mbi rezultatet zgjedhore të shpallura prej Komisionit Qendror Zgjedhor në disa qarqe të vendit.
Sipas kodit zgjedhor, palët kishin mundësi që brenda 5 ditëve të paraqisin pretendimet e tyre pranë Kolegjit Zgjedhor dhe tashmë, ky ka në dispozicion 10 ditë për t'i shqyrtuar ato.
Deri tani, partitë politike të cilat janë ankuar zyrtarisht pranë Kolegjit me kërkesat e tyre janë Partia Demokratike, Partia Socialiste, Partia për Drejtësi dhe Integrim dhe Partia Konservatore.
Sipas të dhënave pranë KQZ-së për agjencinë e Lajmeve NOA, ky kolegj i përbërë nga anëtarët Dhurata Haveri, Sashenka Jonuzi, Astrit Kalaja, Meriban Mullaj, Marie Qirjazi, Entela Prifti, Tom Ndreca dhe Petraq Koço do të nisë procesin e tij fillimisht me shqyrtimin e ankimimit të Partisë Demokratike për qarkun e Fierit.Së bashku, ato kontestojnë vendimet e KQZ lidhur me rezultatet e disa KZAZ-ve në Qarqet e Fierit, Beratit, Tiranës dhe Shkodrës.
n.e/NOA
