Tiranë, 21 korrik NOA - Deputeti i Partisë Socialiste, Erion Braçe, ka dalë në një deklaratë për shtyp sot ku ka bërë të ditur, se qeveria nuk ka para kantieret e ndërtimit.
"Prej 15 ditësh Kryeministri në detyrë Sali Berisha, po vazhdon turin e tij të hapjes së kantiereve të akseve rrugore.
Kësaj here jo për të blerë vota, por për të demonstruar me dhunë, në mënyrë anti-kushtetuese, pa u mbyllur procesi zgjedhor, pa dalë rezultati se do të jetë Kryeministër i vendit.
I gjithë turi i tij qesharak, po shoqërohet me përpjekje të të gjitha akseve rrugore.
Vetëm në 20 ditët e para të korrikut, kanë njohur rrugët e Shqipërisë mbi 20 të vdekur dhe 35 të plagosur. Kryeministri në detyrë nuk ka përgjigje për ta dhe familjet e tyre. I gjithë turi i tij qesharak, po shoqërohet me bllokimin e të gjitha kantiereve të ndërtimit, të hapura në dhjetor të vitit që shkoi, janar të këtij viti, si dhe në prill-maj qershor, për shkak të fushatës së tij elektorale" tha Braçe.
Sipas tij disa qindra kantiere në 6 muajt e parë të këtij viti elektoral, ishin të pambuluar me financim dhe po hapeshin thjesht dhe vetëm për të ndikuar në mënyrë të rremë sjelljen politike të votuesve, tashmë janë realitet.
Ai shtoi se sot qeveria nuk ka para, prandaj kantieret janë bllokuar në të gjithë vendin.
Duke iu referuar faqes zyrtare të MPPTT-së, në portalin e prokurimeve, Braçe deklaroi se nga 39 rrugë të planifikuara për këtë vit, në 35 prej tyre janë çelur vetëm 1 milion lekë të reja fonde për secilën.
Më tej ai shton se në faqen zyrtare të MPPTT, në portalin e prokurimeve, gjendet kjo tabelë në të cilën në zërin e "sistem asfaltimeve" janë 42 rrugë të planifikuara për këtë vit, në 39 prej tyre janë çelur vetëm 1 milion lekë të reja fonde për secilën. E gjithë kjo, kur në portalin e prokurimeve, të APP-së, tenderët për këto rrugë kapin vlerën e mbi 20 miliard lekëve.
"Mjafton t'ju them se për 7 lote të segmentit Plepa-Rrogozhinë, janë tenderuar 6.2 miliard lekë, kur në faqen e MPPTT-së, deklarohen të çelura 7 milionë lekë. Mjafton t'ju them se për aksin Fier-Mallakastër, janë tenderuar 170 milion lekë, kur në faqen zyrtare të MPPTT-së, deklarohen të çelura vetëm 2 milion lekë.
Natyrisht, kjo që kjo ndodhë dhe konfirmon faktin se qeveria nuk ka para. Në ligjin për "Buxhetin e Shtetit 2009", në programin e investimeve të MPPTT-së, zëri ndërtim rrugësh kombëtare ka 36.8 miliard lekë, zëri "sistemim-asfaltim" ka 1.009 miliard lekë. Pra, në total për këto dy zëra, MPPTT, ka në buxhet 37.8 miliard lekë, prej tyre 34 miliard lekë i merr segmenti Milot-Morinë. Ndërkohë që mbeten vetëm 4.4 miliard lekë për rrugën Plepa-Rrogozhinë, Rrugën e Arbrit, 29 akse të tjera kombëtare të tenderuar dhe me kantiere të hapura, qeverisë i duhen mbi 20 miliard lekë" tha më tej Braçe.
k.k/NOA
Â
