Tiranë, 31 Korrik NOA Fotot Update- "Maratona e këngës popullore e qytetare" një spektakël i cili organizohet nga Shoqata Artistike dhe Kulturore "Promotor", po korr sukses në të gjithë vendin dhe po transmetohet për të katërtën herë në Televizionin Klan.
Kësaj here ky spektakël i muzikës popullore shqiptare është mbështetur dhe përkrahur nga kompania celulare AMC.
Maratona e Këngës Popullore është projekti i parë i madh me të cilin TV Klan nisi transmetimet e përmasave të mëdha televizive por në të gjitha edicionet ka rezultuar mjaft i suksesshëm dhe me një audience maksimale.
Në boshtin e këtij projekti është kënga popullore e qytetare, por spektakli duke qenë një manifestim i vlerave muzikore, artistike, kulturore, i ka tejkaluar dimensionet e këngës. Natyrisht që në të, një hapësirë të rëndësishme ka thesari i vlerave popullore, risjelle me tendencat e konceptet muzikore bashkëkohore.
Për të sjellë këtë brum muzikor do të grishen të marrin pjese artistët dhe personazhet më të spikatur të këngës popullore e qytetare.
Spektakli ka treguar që është një eveniment artistik i mirëfilltë, një evokim i vlerave muzikore popullore shqiptare, por edhe një homazh për figurat më të mëdha të kësaj tradite.
Edhe në këtë edicion është arritur realizimi i dimensioneve mbarëshqiptare duke u koordinuar edhe me artistët jashtë kufijve, si në Kosovë, Maqedoni dhe Mal të Zi, duke thithur potencialet më të mira të këtyre trevave.
Në sajë të mbështetjes së AMC sheshet e qyteteve janë kthyer në qendra të vërteta argëtimi për qytetarët si edhe për vizitorët e këtyre qyteteve.
Maratona e Këngës Popullore në bashkëpunim me AMC deri tani ka vizituar qytetet e Gjirokastrës, Sarandës, Elbasanit, Kukësit, Durrësit, Vlorës dhe Ulqinit.
Në vazhdim të këtij turi të muzikës popullore dhe qytetare do të ketë ndalesa edhe në qytetet e Pogradecit, Korçës dhe Lezhës.
/a.k/e.l/NOA/ - Komentoni lajmin e ditës në fund të shkrimit / Klikoni këtu, për rregullat e përdorimit
