Kavajë, 5 gusht NOA - Ishte apo jo autori i një vjedhje të ndodhur një ditë më parë në Kavajë, ai tashmë ishte arrestuar.
Sedra e tij e sëmurë duket se e ka detyruar atë të dënojë vetën me varje, vetëm pak orë pas arrestimit pikërisht në qeli.
Ngjarja ka për protagonist 31-vjeçarin Albert Bajramin nga Kavaja i cili ka tentuar të varë vetën  në dhomën e paraburgimit të Komisariatit të Policisë Kavajë.
Ai ka grisur këmishën e tij duke e sajur si litar për ta përdorur për të varur veten.
Por skena është diktuar nga policët roje të shërbimit të cilët kanë ndërhyrë menjëherë duke i shpëtuar jetën të riun.
Burime nga policia thanë se Barjami ishte kapur ditën e djeshme pasi dyshohet se është autori i një vjedhje të kryer në Kavajë.
Ende pa mbushur 24 orë në qeli, Bajrami ka tentuar t'i japë fund jetës.
Ndërkohë pas mjekimeve në spital, i arrestuari ndodhet në gjendje të mirë shëndetësore.
Bajrami do të merret në pyetje nga policia për të zbardhur rrethanat që e detyruan atë të tentonte t'i jepte fund jetës.
Por dyshohet se 31-vjeçari nuk ka përtypur fakti që është arrestuar për vjedhje që sipas tij nuk e ka kryer një gjë të tillë, megjithatë gjithçka është nën hetim.
k.k/NOA
