Shkup, 10 gusht, NOA - Ambasadori i Bashkimit Evropian në Shkup, Ervan Fuere ka pranuar se tetë vjet nga nënshkrimi i Marrëveshjes së Ohrit, një pjesë e madhe e këtij dokumenti, nuk është zbatuar.
"Duhet bërë akoma shumë. Ende ka çështje të cilat kanë mbetur t'a pazgjidhura nga konflikti i 2001. Duhet bërë shumë për të drejtat e shqiptarëve dhe bashkësive të tjera etnike, përfaqësimin adekuat, si dhe përdorimin e gjuhës shqipe.
Ekziston 'Ligj për gjuhët' por për zbatimin e saj duhet ende shumë punë", ka theksuar evroambasadori Fuere. Sipas tij, nëse do të ketë më shumë përpjekje për zgjidhjen e çështjeve të hapura, nuk do të realizohen kërcënimet e PDSH-së.
Fuere ka shtuar se paralajmërimet për braktisjen e Parlamentit tregojnë se punët në Maqedoni nuk ecin në drejtimin e duhur.
"PDSH është një parti e etabluar. Andaj, nuk është mire që PDSH-ja ta braktisë
Parlamentin. PDSH, është parti e zgjedhur si gjithë partitë e tjera, që të jetë brenda në Parlament e jo jashtë tij. Besoj se problemet dhe shqetësimet e PDSH-së, më mirë do të zgjidhen dhe realizohen në Parlament se sa jashtë tij. Shpresoj se anëtarët e PDSH-së nuk do ta realizojnë këtë kërcënim", ka shtuar euro-ambasadori Fuere.
NOA-INA
Â
