Fier, 12 Gusht NOA Fotot Update - I shumëkërkuari Selami Hasanaj, i cili është dënuar për vrasjen në vitin 2003 të nipit të "Ben Qimes", u arrestua para pak orësh në një operacion special të policisë në Fier, informon korrespondenti i agjencisë së lajmeve NOA.
Mësohet se i shumëkërkuari tentoi të arratisej nga shtëpia ku gjendej i fshehur, por për shkak të rrethimit policor, dështoi dhe u dorëzua më tej, pa bërë rezistencë.
Operacioni u krye nga forcat speciale RENEA, në bashkëpunim me forcat policore lokale, pohoi për agjencinë NOA, një burim zyrtar i Drejtorisë së Policisë së Fierit.
Selami Hasanaj, 43 vjeçar, lindur e banues në Fier, akuzohet për vrasjen e dy personave dhe plagosjen rëndë të një të treti, në një ngjarje të ndodhur gjashtë vjet më parë në qytetin e vendbanimit.
Bëhet fjalë për ekzekutimin në mes të qytetit të të riut Julian Isufaj, nipi i "Ben Qimes", siç njihet Arben Isufaj, në vitin 2003.
Viktima gjendej së bashku me shokun e tij Bledar Kastrati i cili u plagos rëndë në këtë ngjarje.
Po ashtu, humbi jetën edhe kambisti Esat Tare. Gjithçka ndodhi në momentet kur dy të rinjtë po këmbenin një shumë të hollash në tregun e kambistëve të qytetit.
Policia tha atëherë se ngjarja erdhi për shkak të hasmërive të vjetra mes familjeve Hasanaj dhe Isufaj dhe pak kohë më vonë, Selami Hasanaj u dënua me 25 vjet heqje lirie.
Në aksionin e sotëm policor, RENA zbuloi në banesën e Hasanajt, dy pistoleta, një "TT" dhe një "Zastava".
/e.b/e.n/NOA/
