Berlin, 14 Gusht NOA - Autoritetet policore shqiptare në bashkëpunim me ato gjermane kanë arritur arrestimin dhe ekstradimin për në Shqipëri të personave me rrezikshmëri të lartë shoqërore.
Evidentimi në radion Dojçe Vele, seksioni shqip, u bë nga zyrtarë gjermanë të Interpolit berlinez.
Ata ilustruan rastin e djeshëm të kapjes së një personi shumë të kërkuar, i dënuar me burgim të përjetshëm. Adhurim Sallmoni në dhjetë vitet e fundit jetonte i fshehur në Gjermani, pasi ishte në kërkim nga drejtësia shqiptare për vrasjen e dy ushtarakëve dhe tentativën për vrasjen e një ushtari të tretë, në vitin 1990 në qytetin e Durrësit.
Gjykata e këtij qyteti e kishte dënuar Sallmonin me burgim të përjetshëm qysh në vitin 1994 për veprën penale të vrasjes dhe të shpërdorimit të armatimit dhe shkeljes së rregullave të shërbimit ushtarak.
Në bazë të shkëmbimit të informacionit mes Interpol Tiranës dhe Interpol Wiesbaden-it u arrit që Sallmoni të arrestohet në Mynih ku ai qëndronte i fshehur duke u ekstraduar për në Shqipëri.
Lexoni detajet mbi Sallmonin: Vrau kolegun dhe dy ushtarë e i hodhi në det, kapet pas 19 vjetësh nënoficeri
