Prishtinë, 16 gusht NOA Update - Tërheqja e KFOR-it, duhet të realizohet vetëm pas normalizimit të marrëdhënieve Kosovë-Serbi.
Ky është opsioni që hedh Kryetari i Bordit të Klubit për Politikë të Jashtme, Veton Surroi.
Ai bëri të ditur sot se i ka kërkuar sekretarit të përgjithshëm të NATO-s, Anders Fogh Rasmusen, që tërheqja e trupave të NATO-s nga Kosova "të bëhet vetëm pas rrumbullakësimit të shtetësisë së Kosovës, funksionimit të institucioneve shtetërore në tërë territorin e saj dhe normalizimit të marrëdhënieve në mes Kosovës dhe Serbisë".
Surroi ka folur mbi objektivin e z, Rasmusen për tërheqjen e trupave të NATO-s nga Kosova deri në fund të mandatit të tij, dhe ka komentuar synimin.
"Ky objektiv do të jetë i realizueshëm vetëm nëse edhe aktorët tjerë ndërkombëtarë, në radhë të parë BE-ja, arrijnë t'i qartësojnë politikat e tyre karshi Kosovës dhe në qoftë se hapin rrugë për një perspektivë evropiane të vendit", - deklaroi Surroi.
Z. Rasmusen, nga ana e tij, ka dhënë garanci se tërheqja eventuale e trupave të NATO-s do të jetë e kushtëzuar nga analizat paraprake të sigurisë.
Ai është pajtuar se tërheqja e NATO-s duhet të përcillet me një politikë të qartë evropiane për Kosovën dhe rajonin.
/a.b/k.k/NOA/
