Kabul, 21 gusht, NOA - Ndërsa pretendohet të jetë mbyllur në mënyrë disi të qetë procesi i votimit për zgjedhjet presidenciale dhe ato provinciale në afganistan, kanë nisur përplasjet e para për rezultatin e tyre.
Nga ana e tij, shefi i fushatës së presidentit aktual afgan, Hamid Karzai deklaroi sot fitoren e këtij të fundit duke theksuar se Karzai kishte marrë më shumë se gjysmën e votave dhe në këtë mënyrë kishte mënjanuar balotazhin e tetorit.
"Rezultatet e para treguan se presidenti ka marrë shumicën e votave dhe nuk do të zhvillojmë një raund të dytë, pasi kemi marrë shumicën", deklaroi Deen Mohammad.
Por ky lajm është hedhur poshtë nga rivali i tij, Abdullah, i cili e ka deklaruar si fals. Nga ana tjetër, edhe Komisioni Qendror i pavarur afgan i Zgjedhjeve nuk konfirmoi fitoren e presidentit Hamid Karzai që në raundin e parë të zgjedhjeve, ashtu siç u pretendua nga shefi i fushatës së këtij të fundit.
''Kërkoj nga drejtuesit e fushatave të kandidatëve që të jenë të duruar'', deklaroi Barakzai, kreu i KQZ në Afganistan.
Ndërkaq, zyrtarët afganë thonë se ata arritën të hapin 95 për qind të qendrave të votimit, por vëzhguesit thanë se pjesëmarrja në votime dukej të ishte shumë më e ulët sesa në zgjedhjet e para demokratike të vendit në vitin 2004.
Ata thane se votuesit dukej se ishin frikësuar për të shkuar në qendrat e votimit, veçanërisht në rajonet jugore ku talebanët kanë bazën e tyre.
Dhuna në Kabul, Kandahar dhe qytete të tjera të rëndësishme la të vrarë të paktën 26 vetë në të gjithë vendin. Ndër të vrarët ka 9 civilë, 9 policë dhe 8 ushtarë afganë.
n.e/NOA
