Prizren, 22 gusht NOA-Dy persona kanë grabitur mbrëmë Korporatën Energjetike të Kosovës në qytetin e Prizrenit duke marrë nga arka e saj rreth 33 mijë euro.
Sipas policisë së Kosovës, Â efektivat janë vënë në ndjekje të personave të dyshimtë të cilët në ikje e sipër kanë plagosur dhe një punonjës të Korporatës.
Avdi Temaj, ka marrë dy plumba dhe jeta e tij ka qenë në rrezik, por ai ka mbijetuar pas operacionit që i është bërë në Spitalin e Prizrenit.
Një punonjës i një kompanie private të sigurimit ka marrë vetëm lëndime të lehta trupore.
Drejtori i Policisë rajonale të Prizrenit, Nexhmi Krasniqi, deklaroi se të dyshuarit e kanë shoqëruar punonjësin e KEK-ut, i cili është nisur në drejtim të një banke për t'i dorëzuar paratë e grumbulluara në arkë gjatë ditës.
Të dyshuarit, të hipur në motoçikleta, sipas tij, pas kryerjes së krimit janë larguar në drejtim të panjohur.
Bazuar në informacionet e mbledhura, policia e Prizrenit, sipas tij, ka hartuar planin e ndriçimit të këtij rasti dhe me këtë rast ka zhvilluar një operacion bastisjeje në një kampshtëpizë në fshatin Reçan, ku policia dyshon se mund të jetë baza e plaçkitësve.
"Aty kemi gjetur rreth 20 telefona mobil dhe një sasi municioni, por jo të dyshuarit", tha drejtori i policisë së Prizrenit, Nexhmi Krasniqi, sipas të cilit, policia është në kërkim të autorëve të kësaj ngjarjeje.
m.i/NOA
