Bruksel, 25 gusht NOA-Sekretari i Përgjithshëm i NATO-s Anders Fo Rasmusen do të vizitojë Turqinë këtë javë, për takime me zyrtarë të lartë dhe për të marrë pjesë në një darkë iftari me rastin e fillimit të muajit të shenjtë të Ramazanit për besimtarët myslimanë.
Diplomatë të lartë thonë se zoti Rasmusen shkon në Turqi të enjten, ku do të takohet me Presidentin Abdulah Gul, kryeministrin Rexhep Taip Erdohan dhe me Ministrin e Jashtëm Ahmet Davutoglu. Ai po ashtu do të jetë i ftuar për një darkë iftari, kur besimtarët myslimanë hanë një darkë të bollshme, pasi kanë agjëruar gjatë ditës, sipas zakonit në muajin e shenjtë të Ramazanit.
Kjo do të jetë vizita e parë e ish-kryeministrit danez Rasmusen në Turqi, që nga fillimi i detyrës në postin e Sekretarit të Përgjitshëm të NATO-s në muajin gusht.
Fillimisht zyrtarët turq e patën kundërshtuar emërimin e tij në postin e kreut të NATO-s, për shkak të daljes në mbrojtje të karikaturave që paraqisnin Profetin Muhamed, si dhe për mosndalimin e një televizioni me bazë në Danimarkë, me lidhje me separatistët kurdë. Por Presidenti amerikan Barak Obama mundi ta bindë Turqinë të heqë dorë nga kundërshtimi i emërimit të zotit Rasmussen gjatë një takimi të NATO-s në muajin prill.
Â
