Tiranë, 26 gusht NOA - Kryetarja e Kuvendit të Shqipërisë, Jozefina Topalli përmes një letre dërguar Kryetarit të Senatit Amerikan Robert Byrd, përcolli ngushëllimet për ndarjen nga jeta të senatorit Ted Kennedy.
Në letrën e saj, Kryetarja e Kuvendit shkruan: "Më lejoni t'u shpreh ngushëllimet më të thella Ju dhe gjithë Senatit amerikan, në emër të gjithë anëtarëve të Kuvendit të Shqipërisë dhe timin personal, për humbjen e Senatorit më të respektuar në histori, Edward Kennedy.
Senatori Kennedy mbetet një legjendë legjislative, ikonë e politikës, luftëtari për liri civile, besimtari inspirues i ëndrrës për demokraci.
Me ndarjen nga jeta të Edward Kennedy-it, Senati amerikan humbi reformatorin kurajoz, Shtetet e Bashkuara një lider të madh si vëllezërit e tij dhe gjithë bota një shtetar të madh."
Në letrën e saj Kryetarja e Kuvendit shpreh ngushëllimet edhe për bashkëshorten Victoria, fëmijët dhe të afërmit e senatorit Kennedy.
b.a/NOA
