Shkodër, 29 Gusht NOA - Një vrasje e ndodhur plot dhjetë vjet më parë, është arritur të zbardhet vetëm ditët e fundit duke u mbyllur si dosje sot herët në mëngjes kur u ekzekutua fletë arresti për të dyshuarin e vetëm të ekzekutimit të një 20-vjeçari.
Policia e Shkodrës, ka konfirmuar prangosjen e 60-vjeçarit Gjergj Ara lindur në fshatin Palaj të Komunës Shosh dhe banues në Oblik të Komunës Ana e Malit në Shkodër.
Burime zyrtare policore nga Sektori Kundër Krimeve të Rënda, i thanë korrespondentit të agjencisë së lajmeve NOA se kapja e Arës erdhi "si rezultat i një pune të mirë operative dhe proçeduriale për zbulimin e dokumentimin ligjor të ngjarjeve të vjetra të pazbuluara".
Bëhet fjalë për ekzekutimin më 26 qershor 1999, në fshatin Palaj të Komunës Shesh-Dukagjin Shkodër ku është vrarë me armë zjarri 20-vjeçari Lek Malota.
Për këtë ngjarje, nga ana e Prokurorisë së Rrethit Gjyqësor Shkodër është bërë rifillimi i hetimeve pak javë më parë.
Në vijim të hetimit, është bërë e mundur nga policia, zbulimi dhe identifikimi i autorit të krimit dhe dje (e premte), është lëshuar Urdhër Ndalimi për autorin e dyshuar Gjergj Ara.
Policia tha se kapja e 60-vjeçarit u bë e mundur në fshatin Oblik të Komunes Ana e Malit Shkodër dhe tani ai përballet me akuzat për veprat penale të "vrasjes me dashje" dhe "mbajtjes pa leje të armëve dhe municioneve luftarake".
/r.d/e.n/NOA/
