Gjenevë, 30 Gusht NOA - Organizata Botërore e Shëndetësisë paralajmëroi sot se po paraqitet forma më e ashpër e H1N1, i njohur në masën e gjerë si gripi i derrave.
OBSh citoi sot se "mjekët janë duke raportuar se një formë më e rëndë gripit të derrave që shkon drejtë në mushkëri është duke shkaktuar sëmundje të rëndë, tek moshat e reja dhe njëkohësisht trajtimi i kësaj sëmundje në spital është i shtrenjtë".
Zyrtarë nga Organizata Botërore e Shëndetësisë pohuan edhe faktin se disa vende raportojnë se deri në 15% e pacientëve të hospitalizuar me virusin pandemik H1N1, kanë nevojë për kujdes intensiv.
Ndërkohë në Shqipëri, Instituti i Shëndetit Publik thotë se virusi i rrezikshëm A/H1N1, i cili deri më tani ka infektuar 29 persona të vend mund të shumëfishohet gjatë muajit shtator e në vijim.
Sipas mjekëve pritet që të paktën 15 persona të konfirmohen në çdo jave si të prekur nga gripi i derrave ku 10 prej tyre mund të jenë mbartës duke e kaluar lehtë virusin.
Madje ISHP ka paralajmëruar një shtator epidemik duke theksuar se viruset sezonale apo gripi i derrave pritet të shtojnë rastet gjatë muajit shtator.
Sipas ISHP, hapja e shkollave, kontaktet e njerëzve në vende të populluara pritet të sjellin dhe shtimin e viruseve.
Deri më tani në Tiranë, ISHP ka konfirmuar 29 raste të infektuar nga gripi i derrave ku vetëm njëri prej tyre ndodhet në gjendje të rëndë, ndërsa mes tyre janë edhe tre fëmijë por gjendja e tyre paraqitet e stabilizuar
k.k/NOA
