Beograd, 31 gusht, NOA - Rada Trajkoviç, nënkryetarja e Këshillit Nacional Serb, është ndër liderët e paktë serbë, në Kosovë dhe Serbi, e cila mbështet pjesëmarrjen e serbëve në zgjedhjet lokale të 15 nëntorit.
Këtë fakt ajo e ka bërë publik përmes një thirrje që u ka bërë serbëve që banojnë në territorin e Kosovës, që të mos ta bojkotojnë procesin e 15 nëntorit, por të jenë pjesëmarrës të tij, duke thënë fjalën e tyre për drejtimin e vendit ku jetojnë.
"Me daljen në zgjedhje, nëse ndodh decentralizimi, ne mund t'i kthejmë komunat që i kemi humbur. Mund ta fitojmë pushtetin në Graçanicë, që bashkë me 16 fshatra serbe e paraqet një tërësi territoriale, e cila gjendet vetëm 3-4 kilometra larg Prishtinës", ka thënë Trajkoviç lidhur me një fakt të tillë. . Ajo ka thënë se për serbët është realitet i hidhur që këto zgjedhje i ka shpallur presidenti i Kosovës, Fatmir Sejdiu, por ka shtuar gjithsesi se dalja në zgjedhje është rruga më e mirë për ta. n.e/NOA
