Tiranë, 1 shtator, NOA - Kryeministri Berisha mori pjesë me ftesë të homologut të tij polak, Donald Tusk, në ceremoninë e organizuar me rastin e 70-vjetorit të sulmit nazist mbi Poloninë, moment historik ky që shënon fillimin e Luftës së Dytë Botërore.
Sipas të dhënave për agjencinë e Lajmeve NOA nga Këshilli i Ministrave, në ceremoninë përkujtimore merrnin pjesë 20 liderë dhe personalitete të larta evropiane si presidenti polak Lech Kaczynski, kryeministri polak Donald Tusk, kryeministri francez François Fillion, kryeministri i Çekisë Jan Fischer, kancelarja gjermane Angela Merkel, kryeministri i Rusisë Vladimir Putin etj.
Ceremonia u zhvillua në gadishullin Vesterplatte në vendin ku gjermanet kryen sulmin e parë kundër garnizonit polak që mbronte qytetin e Gdanskit, i cili shënon edhe organizimin e rezistencës dhe qëndresës polake kundër Gjermanisë naziste.
Gjate ceremonisë, liderët e vendeve pjesëmarrëse vendosen kurora dhe pishtarë tek varrezat e mbrojtësve të Gdanskit, si dhe zhvilluan homazhe të cilat u shoqëruan me nderime ushtarake për nder të mbrojtësve të qytetit, të rënë gjatë sulmit nazist dhe viktimave të Luftës së Dytë Botërore.
Gjatë ceremonisë, kryeministri Berisha u takua dhe bisedoi me presidentin e Polonisë Lech Kaczynski dhe kryeministrin polak Donald Tusk, me kancelaren Merkel, me kryeministrin italian Silvio Berlusconi si edhe kryetarin e Parlamentit Evropian Jerzy Buzek dhe me personalitetet e tjerë te pranishëm në ceremoni, te cilët e përgëzuan Kryeministrin Berisha për realizimin dhe për mbylljen me sukses të procesit zgjedhor dhe për fitoren e arritur në këto zgjedhje nga koalicioni i djathtë.
Njëkohësisht, personalitetet e larta evropiane e garantuan kryeministrin Berisha edhe për mbështetjen e tyre mbi projektin e Shqipërisë evropiane.
n.e/NOA
